Skoolhoof

Mnr Wikus Naudé – Skoolhoof

Mnr. Wikus Naudé is aan die begin van 2016 aangewys as die nuwe skoolhoof van die Blackies. Mnr. Naudé is ’n man met ’n passie vir onderwys, die natuur en sport. Hy het al ’n wye draai in die onderwys gestap, maar is ’n veelsydige leier. “My paadjie het al in 1989 begin toe ek gaan skool gee het by my alma mater Hoerskool Hoogenhout in Bethal, Mpumalanga. Ek het op Pukke studeer waar ek my BSc-graad verwerf het en daarna my honneurs in onderwysbestuur.” Hierdie is Naudé se derde skool waar hy as skoolhoof diens doen, “Ek was eers die waarnemende hoof vir byna twee en ’n half jaar by Hoërskool Ermelo voordat ek vir die afgelope vyf jaar by Generaal Hertzog Hoërskool in Witbank die skoolhoof was.”

Hy is getroud met Hannatjie en hul het drie dogters waarvan twee in die onderwys is. Mnr. Naudé se liefde vir sport straal uit. “Dit het begin by krieket, en later was ek die president van Skoleskiet SA. Die nasionale weermag het rondom 2000 die .22-gewere terug getrek waarna ek en ’n vriend luggeweerskiet amptelik begin het.

In 2003 het die Mpumalanga Rugby-unie my genader om met hul rekenaarvaardighede te help. Ook in dieselfde jaar is ek aangestel as die Pumas se provinsiale spanbestuurder. In 2004 is ek opgeroep as tegniese adviseur vir die Pumas se Cravenweek-span.”

Die jaar 2015 was ook baie spesiaal vir hom, “Ja, na my tyd by die Pumas is ek in 2015 gekies op die uitvoerende bestuur vir SA Skolerugby waarop ek vandag nog dien.” Of dit nou kamp, jag of houtwerk is, Naudé se hande staan vir niks verkeerd nie. “Ek het ’n ongelooflike passie vir houtwerk. Die skool het vir my ’n lokaal beskikbaar gestel wat ek dan met my toerusting ingerig het. Dan is daar natuurlik my liefde vir jag, kamp en die natuur in die algemeen.”

Hy het ’n duidelike visie en droom vir Hugenote se pad vorentoe, “Ek wil graag vir Hugenote as een van die heel beste skole in die Kaap vestig. Ons wil die skool beter posisioneer om vir ons leerders nog beter geleenthede te skep. Dis ook vir my belangrik dat ons die dorp se kinders behou en benut.”