Huis Hugenoot

Ons streef daarna om Huis Hugenoot ‘n huis te maak waar ongeveer 110 seuns en dogters veilig en gelukkig op die skoolterrein kan woon en hul aktiwiteite beoefen. Die voordeur van die koshuis is 80 meter vanaf die skool se voordeur en langs ‘n 25 meter swembad wat leerders die geleentheid gee om aan alle skool- en ontspanningsaktiwiteite deel te neem.

Ons beskik oor ‘n ontspanningslokaal en twee platskerm TV’s met DStv, sowel as ander ontspanningsgeriewe. Die studiesaal is toegerus met lugreëling en daar is rekenaars met internettoegang. Al ons badkamers is onlangs gemoderniseer en ontlok baie komplimente van almal wat in die koshuis tuisgaan.

Ons kinders kom van oraloor, van so ver as Namibië, Botswana, die Noord-Kaap, die Wes-Kaapse platteland en die noordelike voorstede. Ons is dankbaar om kinders te hê wat ‘n groot rol in alle aspekte van die skoollewe speel. Ons streng keuringsproses vir koshuistoegang verseker dat ons goedgemanierde leerders het wat in elke faset van die skoolprogram ‘n groot bydrae maak.

Leerders het, met toestemming van ouers, ook die geleentheid om aan aktiwiteite buite die skool deel te neem, bv. perdry en fietsry. Leerders wat kuns as vak neem, word teen betaling deur die skool na die kunssentrum in die Paarl vervoer. Leerders wat ander spesiale vervoerbehoeftes het, word op ‘n ad hoc-basis hanteer. Die skool het ‘n uitnaweekbusdiens wat teen vergoeding Noord-Kaap leerders huis toe neem.

Ons poog om ‘n huislike atmosfeer te skep, veral vir die leerders van ver wat oor naweke inbly. Hulle word gereeld op uitstappies geneem en ons probeer hulle so dikwels as moontlik oor naweke bederf. Ons streef na ‘n balans tussen ferm, opbouende dissipline en ‘n lekker ontspanne atmosfeer. Ons wil graag ‘n oop kommunikasiekanaal tussen koshuis en ouerhuis skep en ouers kan op verskeie wyses met die diensdoenende personeel en die superintendent kontak maak.

Telefoon
Kombuis: 021-873-1120
Superintendent: 021-873-1120 of 072-240-7128 / 072-435-9400

E-pos
burgerp@hugenoteskool.co.za
selzerc@hugenoteskool.co.za
burgerj@hugenoteskool.co.za

Koshuis Personeel

Koshuis Gallery